ನಮ್ಮ ಮುಂದಿನ ಹೊಸ ಹೊಸ ಸಂಶೋಧನೆಗಳನ್ನು ಪ್ರಕಟಿಸಿ ಜನಮುಖಿಯಾಗಿಸುವತ್ತ ಹಲವಾರು ಪತ್ರಿಕೆಗಳು ಕಾರ್ಯಪ್ರವೃತ್ತವಾಗಿವೆ. ಸಂಶೋಧನೆಗಾಗಿಯೇ ಕೆಲವು ಪತ್ರಿಕೆಗಳು ವಿವಿಧ ಭಾಷೆಯಲ್ಲಿ ಕಾರ್ಯಪ್ರವೃತ್ತವಾಗಿವೆ. ಆದರೆ ಕನ್ನಡದ ಸಂದರ್ಭದಲ್ಲಿ ಸಂಶೋಧನೆಗಾಗಿಯೇ ಮೀಸಲಿರುವ ಪತ್ರಿಕೆಗಳು ತೀರಾ ವಿರಳ. ಹೀಗಾಗಿ ಸಂಶೋಧನೆಯನ್ನೇ ಕೇಂದ್ರವಾಗಿಟ್ಟುಕೊಂಡು ಒಂದು ಪತ್ರಿಕೆಯನ್ನು ಆರಂಭಿಸಬೇಕೆಂಬ ತುಡಿತ ನಾನು ಸಂಶೋಧನಾ ವಿದ್ಯಾರ್ಥಿಯಾಗಿದ್ದಾಗಿನಿಂದಲೂ ನನ್ನೊಳಗೆ ಮನೆಮಾಡಿಕೊಂಡಿತ್ತು.

ನನ್ನ ಬಹುದಿನದ ತುಡಿತದ ಭಾಗವಾಗಿ ಒಂದು ಹೆಜ್ಜೆಯನ್ನು ಮುಂದಿಡಲಾಗಿದೆ. ಇದರ ಫಲವೇ ‘ಅರಿವು ಅಸ್ಮಿತೆ’ ಎಂಬ ತ್ರೈಮಾಸಿಕ ಪತ್ರಿಕೆ. ಇದು ಕನ್ನಡ ಮತ್ತು ಇಂಗ್ಲಿಷ್ ಭಾಷೆಯಿಂದ ಕೂಡಿದೆ. ಸಂಶೋಧನಾ ಕ್ಷೇತ್ರದಲ್ಲಿ ಕಾರ್ಯಪ್ರವೃತ್ತರಾಗಿರುವ ಸಂಶೋಧನಾರ್ಥಿಗಳು ಹಾಗೂ ನಾಡಿನ ವಿವಿಧ ವಲಯದ ಸಂಶೋಧಕರು ನಡೆಸಿದ ಅಧ್ಯಯನದ ಮಾಹಿತಿಯನ್ನು ಜನಮುಖಿಯಾಗಿಸುವ ಆಶಯವನ್ನು ಈ ಪತ್ರಿಕೆ ಒಳಗೊಂಡಿದೆ. ಆದ ಕಾರಣ ನಾಡಿನ ವಿವಿಧ ವಲಯದ ವಿದ್ವಾಂಸರು, ಚಿಂತಕರು, ಸಂಶೋಧಕರುಗಳು ನಮ್ಮ ಈ ಕಾರ್ಯಕ್ಕೆ ಬೆಂಬಲ ಮತ್ತು ಪ್ರೋತ್ಸಾಹ ನೀಡಬೇಕಾಗಿ ವಿನಂತಿಸಿಕೊಳ್ಳುತ್ತೇನೆ.

ಏಕಾಂತಗಿರಿ ಟ್ರಸ್ಟ್ ಅಡಿಯಲ್ಲಿ ಈಗಾಗಲೇ ಪುಸ್ತಕ ಪ್ರಕಟಣೆ, ಸಾಮಾಜಿಕ ಜಾಗೃತಿ ಮುಂತಾದ ಸೇವೆಗಳನ್ನು ಆರಂಭಿಸಿದ್ದು, ಮುಂದುವರೆದು ‘ಅರಿವು ಅಸ್ಮಿತೆ’ ಎಂಬ ಸಂಶೋಧನಾ ಪತ್ರಿಕೆಯ ಪ್ರಕಟಣೆಗೂ ಮುಂದಾಗಿದ್ದೇವೆ. ನಮ್ಮ ಈ ಕಾರ್ಯಕ್ಕೆ ನಿರಂತರವಾಗಿ ಪ್ರೋತ್ಸಾಹ ನೀಡುತ್ತ ಬಂದಿರುವ ನಮ್ಮ ಟ್ರಸ್ಟಿನ ಎಲ್ಲಾ ಸದಸ್ಯರಿಗೂ, ಗುರುವೃಂದಕ್ಕೂ ಹಾಗೂ ನನ್ನ ಎಲ್ಲಾ ಆತ್ಮೀಯ ಸ್ನೇಹಿತರಿಗೂ ನಾನು ಸದಾ ಅಭಾರಿಯಾಗಿದ್ದೇನೆ.